ANG GAHOM SA PAGKABANHAW: PAGBUNTOG SA PAGDUHADUHA
Ikaduhang Domingo sa Pagkabanhaw
Ellinwood UCCP-Visayan Service
April 11, 2010, 3:00pm
Lucas 24:36-49
PASIUNA
Maayong hapon… ug maayong Domingo sa Pagkabanhaw.
Nagpadayon kita sa pagsaulog sa Domingo sa Pagkabanahaw. Karong Domingoha, mao kini ang Ikaduhang Domingo sa Pangkabanhaw. Ang inyong tema alang sa pagpamalandong mao ANG GAHOM SA PAGKABANHAW: PAGBUNTOG SA PAGDUHADUHA. Ug kini gibase sa Lucas 24:36-49.
NAGPALUYONG KASAYURAN
Ang sugilanon nga gibasa kaganina nahitabo niana nga adlaw sa Domingo diin nahibaw-an na nga wala na si Jesus sa lubnganan.
Sayo niana nga buntag, miadto sa lubnganan, dire sa Lucas, giingon ra nga MGA BABAYE. Ginganlan ni Marcos ang mga Babaye nga sila Maria Magdalena, Maria nga inahan ni Santiago ug si Salome. Sa Mateo, si Maria Magdelana ug laing Maria ang miadto sa lubnganan. Sa Juan, si Maria Magdalena ra ang gihisgotan nga maoy miadto sa lubnganan.
Mga babaye ba sila o usa ra ka babaye, ang importante natong timan-an nga babaye ang miadto sa lubnganan aron sa pagbuhat sa naandan nilang gawi sa pagdihog ug pahumot sa lawas ni Jesus.
Importante kini nato nga timan-an labi na kung atong itandi ang lihok sa mga babaye ug mga lalaki nga mga tinun-an ni Jesus sa dihang nag-antos na si Jesus.
Kung atong balikan ang sugilanon… atong mahinumduman nga:
Gilimod ni Pedro nga nakaila siya kang Jesus… 3X, iyang gilimod si Jesus.
Ang ubang mga tinun-an, nanago… wala sila nagpaduol kang Jesus. Wala nila tabangi si Jesus. Sa dihang nag-antos na si Jesus sa pagpas-an sa krus… wala’y mitabang kaniya. Si Simon nga taga Cirene gipugos sa mga sundalo sa pagpas-an sa krus. Kinsa man ni si Simon nga taga Cirene? Gikan siya sa layong dapit ug bag-o ra gayon miabot sa siyudad sa Jerusalem. Siya hinuon ang nakatabang sa pagpas-an sa krus ni Jesus… dili ang iyang mga tinun-an nga iyang nakauban sa taas nga panahon… mga tinun-an nga iyang gipasabot sa mga plano sa Dios alang sa katawhan. Kini nga mga tinun-an, nanago na hinuon. Wala tuod nila gilimod si Jesus sama sa gibuhat ni Pedro, apan ang ilang pagpalayo kang Jesus sama ra nga gisalikway nila siya.
Wala gani sila mitabang sa paglubong kang Jesus. Masabot unta nato ang ilang kahimtang, tungod kay naglikay naman sila sa mga autoridad kay haduol naman ang Adlaw sa Igpapahulay. Sanglit si Jose nga taga-Arimetea maoy mihangyo ngadto sa Labawng Hukmanan sa lawas ni Jesus. Mipalit siya ug panapton nga lino ug lana. Gikuha niya ang lawas ni Jesus ug gilubong niya kini sa iyang lubnganan. Mitabang ba kaniya ang mga tinun-an ni Jesus? --- Ang mga babaye maoy misunod kang Jesus maoy mikuyog kang Jose hangtod sa gilubong si Jesus.
Mao kadto nga sayo sa buntag mibalik ang mga babaye aron sa pagdihog sa lawas ni Jesus ug mga puhomot. Niana nga sayo sa buntag ilang nahibaw-an nga wala na ang lawas ni Jesus sa lubnganan.
Nabanhaw ba siya? Sa pagtoo sa mga tinun-an ni Jesus, wala siya mabanhaw kundili, basin may nagkuha sa iyang lawas. Tungod niini, misamot ang ilang kahadlok. Samot sila nga nanago.
ANG PAGBADBAD SA TEKSTO
Ang atong teksto karon nagpunting diha sa higayon diin nagpakita si Jesus sa iyang mga tinun-an…
Asa ang mga tinun-an? Tua nanago lang gihapon… sa Maayong Balita sumala ni Juan, tataw gayod niyang gisaysay nga
“nagtigom ang mga tinun-an ug gitrangkahan nila ang pultahan kay nahadlok man sila sa kadagkoan sa mga Judio.” (Juan 20:19
Mitungha ra sa kalit si Jesus taliwala nila ug miingon, Ang kalinaw mag-uban kaninyo.”
Wala siya mangastigo…wala siya mangasaba… wala siya manukmat… Imbes, kalinaw ang iyang gihatag sa iyang mga tinun-an.
Kalinaw… taliwala sa ilang pagkahadlok
Kalinaw… taliwala sa ilang kalibog
Kalinaw… taliwala sa ilang pagduhaduha.
Si Jesus ba gyod kini… o usa ra ka kalag… espiritu ba kaa… o multo nga nagpakita kanila.
Kabahin sa tinuohan sa mga Judio ang pagkabanhaw. Apan, tungod kay wala pa man mahitabo ang pagkabanhaw sa tanang mga namatay… mituo ang tinun-an nga possible si Jesus nagpakita kanila isip usa ka kalag o espiritu o multo, “ghost.”
Nasayod si Jesus sa mga hunahuna nga midagan sa ilang mga alimpatakan…
Mao nga gidapit niya sila sa paghikap sa iyang mga kamot ug mga tiil.
Miingon si Jesus, “Nagong nabalaka man kamo? Nganong nagduhaduha kamo? Tan-awa ninyo ang akong mga kamot ug mga tiil. Ako gayod kini. Hikapa ako ang Makita ninyo ka yang espiritu walay unod ug mga bukog sama sa nakita ninyo nga ania kanako” (Luc 24:39.
ANG PANGUTANA
Kahibalo baya gyod ang Ginoo nga nabalaka ug nagduhaduha ang mga tinun-an. Dili ba kini obvious… nanarangka gyod sila1 Kinahanglan pa ba kining pangutan-on? Apan nangutana lang gihapon ang Ginoo.
Usa sa mga lisod nga pangutana mao ang NGANO? Sa dili ka pa mutobag niini, kinahanglang “you have to go deep into the recesses of your mind”; kinahanglang maghunahuna sa kag lawm isa ka motubag, dili ba? Labi na ang pangutana ni Jesus: nganong nabalaka ug nagduhaduha man kamo?
Usa kini ka hagit sa Ginoo nga angkonon sa mga tinun-an ang ilang tinud-anay nga pagbati. Angkonon nila atubangan sa Ginoo nga wala sila motuo kaniya… angkonon nga gubot ilang hunahuna.
Sama kanato, lisod sab sila nga angkonon ang tininuod nila nga gibati. Sama kanila usab, we prefer to put up a brave front. Sa daghang higayon, hilig nato nga magpa aron-ingnon nga isog ta..nga kahibalo ta. Dili ta ganahan nga atubangon ang atong mga kapakyasan ug kakulangon.
Ang pangutana ni Jesus nagahagit sa mga tinun-an, ug padayon nga nagahagit kanato sa pag-angkon ngadto sa Ginoo sa atong mga kapakyasan ug kasaypanan aron maihatag sa Ginoo ngari kanato ang iyang kalinaw.
Kalinaw nga base sa kamatuoran nga
nabuntog na niya ang tanang kagamhanan nga hinungdan sa mga pag-antos sa katawhan. Ang kagamhanan sa Emperyo sa Roma o bisan ang kagamhanan sa temple sa mga Judio, kun Jewish Temple authorities, wala makalupig kang Jesus. Wala siya magpabiling patay. Ania siya buhi sa ilang atubangan.
Kalinaw kini nga base sa kamatuoran nga
gituman ni Jesus ang iyang mga saad. Dili ba miingon siya nga “kinahanglang mag-antos ang Mesiyas niining mga butangan ug unya mosulod sa iyang himaya?’ (v26) Ug nia na karon natuman na gayod ang mga saad nga gisulat ni Moses hangtod sa mga sinulat sa tanang propeta.
Kalinaw kini nga base sa kasiguruhan nga
ang Ginoo maga-uban ug naga-uban kanila masabtan man nila kini o dili. Sa dihang naglakaw ang mga tinun-an sa dalan padulong sa Emaus, nagpakita kanila si Jesus, apan wala sila mahibaw nga si Jesus na diay to. Naablihan lang ang ilang mga mata sa dihang nangaon na sila.
TAN-AW…HIKAP
Human ihatag ni Jesus ang iyang Kalinaw…ug hagiton ang mga tinun-an sa pag-angkon sa ilang mga kahadlok, kabalaka ug pagduda… iyang ambit sila sa pagtan-aw ug paghikap sa kamatuoran sa iyang lawasnon nga pagbanhaw.
Tan-aw
Sa hukmanan panahon ni Jesus, ang testimonyo sa mga kababayinhan walay lig-on. Ang testorya-estorya ug mga taho dili lig-ong pagmatuod sa usa ka hitabo. Apan ang pagmatuod tungod kay nakita man ang maong hitabo, sa hukmanan, lig-on kini ug kasaligan nga ebidensya.
Gi-ambit ni Jesus ang iyang mga tinun-an aron sa pagtan-aw aron mawala ang ilang pagduha-duha sa iyang lawasnon nga pagbanhaw. Apan mahimo usab nga malinla sila sa ilang nakita. Posible man lagi nga ang nakita nila usa ra ka multo… espiritu o kalag.
Hikap
Dili lang paigo nga makit-an sa mga tinun-an aron mapamatud-an ang iyang pagkabanhaw. Gi-awhag pa gayod ni Jesus sila sa paghikap aron mas mahimong lig-on ang ilang pagtoo nga tinuod gayod nga nabanhaw si Jesus. “Tungod ka yang espiritu walay unod ug mga bukog.”
ALANG KANATO…
Dali ta mobasol sa mga tinun-an sa ilang pagkawalay pagtoo ug pagsalig sa Ginoo. Ato dayon silang gihukman… mga talawan… mga walay pagsalig…
Apan sa atong pakigtabo sa pulong sa Dios, labi sa sugilanon sa pagkabanhaw ni Jesus, atong matun-an nga:
1. Gihagit hinuon kita sa Ginoo sa pag-angkon kaniya sa atong mga kabalaka ug pagduhaduha. Padayon ang Ginoo sa pagpangutana kanato: nganong nabalaka man kamo? Nganong nagduhaduha man kamo?
Mosugyot unta ko ug pila ka mga tubag niani nga pangutana:
1. Isip usa ka Pilipino, nabalaka kami, Ginoo, nga basin ang umaabot nga eleksyon mahimong gubot…mahugaw… puno sa limbong. Nagduhaduha kami Ginoo, nga matuman ang among gipangandoy nga kabag-uhan sa kagamhanan pinaagi niini nga piniliay.
2. Isip usa ka iglesiya: nabalaka kami, Ginoo nga wala na kami motuman sa imong kabubut-on kondili sa kabubut-on sa mga atua sa kagamhanan. Nagduhaduha kami nga aduna kami’y mahimo aron madala ang imong iglesya ngadto sa imong katuyuan.
Daghan pa… aduna kitay mga personal nga gikabalak-an; aduna kitay daghang gikatahapan ug gidudahan. Nabalaka kita sa kaugmaon sa atong pamilya… nagduhaduha kita sa pagkamatinud-anon sa mga tawo nagpalibot kanato… Unsa man kini nga atong gikabalak-an ug gikatahapan… Gihagit kita sa Ginoo sa pagsugilon niini ngadto kaniya aron iyang ikahatag ang iyang kalinaw.
Kalinaw nga gibase sa kamatuoran nga nabuntog na niya ang tanang gahom nga hinungdan sa atong pag-antos, kabalaka ug pagduhaduha.
Kalinaw sumala sa kamatuoran nga ang iyang mga saad matuman gayod. Unsa man kini nga saad nga gihatag kanato sa Ginoo, huptan nato kini… kay tumanon gayod kini sa Dios.
Kalinaw tungod tinud-anay gayod nga ang Dios naga-uban kanato.
2. Giahwag usab kita sa Ginoo sa pag-tan-aw ug paghikap. Tan-awon nato ug hikapon… nanginahanglan ba kita ug kamatuoran sa gahom sa pagkabanhaw ni Jesus sa atong kinabuhi ug sa atong nasod? Nanginahanglan ba kita ug ebidensya? Ihatag kini kanato sa Ginoo.
Unsa mang ebidensya ang atong gipangita karon?
1. pangayoon nato sa Ginoo nga tinud-anay gayod nga makita nato ang kamatuoran sa iyang pagkabuhi sa atong taliwala… Makita nato kini sa atong iglesya ug sa atong nasod. Masinati nato kini sa atong tagsa-tagsa ka kinabuhi.
2. Dili motugot ang Ginoo nga magpabilin kita sa pagduhaduha sa iyang pagkabanhaw. Dili lang kini usa ka ideya… tulun-an, sermon nga madungog nato. Ang pagkabanhaw sa Ginoo tinuod nga atong makit-an ug masinati gayod.
ANG HAGIT
Mga kaigsoonan kang Cristo
Giambit kita sa Dios aron atong dad-on ngadto kaniya ang atong mga kabalaka ug pagduhaduha
ang atong kalipay ug kahangawa, ang atong mga pangamuyo ug pagdayeg
Ug ihalad nato kini alang sa tibuok kalibutan ug tanan niini nga binuhat
Mag-ampo kita…
PAG-AMPO
Ablihi ang among mga kasingkasing, O Dios, sa imong gahom nga nagalihok
Palibut kanamo, taliwala kanamo ug sulod kanamo,
Hangtod nga ang imong himaya mapadayag pinaagi sa among gugma ngadto sa among mga higala ug dili higala,
Sa katilingban nga nabag-o pinaagi sa katarong ug puangod
Ug sa pagpasig-uli sa tanang naguba. Amen
